Frétt á Mbl.is

Sep 14 '15

~~Innlent | mbl | 14.9.2015 | 9:51
Brotist inn í átta sumarbústaði
 .
Brotist var inn í átta sumarbústaði í Bláskógabyggð í síðustu viku. Þjófarnir spenntu upp glugga eða tóku hurðir af hjörum til að komast inn í húsin. Þeir stálu fyrst og fremst flatskjáum.
Í einhverjum tilvikum var unnið eignatjón, samkvæmt upplýsingum lögreglunnar á Suðurlandi.

Samkvæmt þessu er full ástæða til að loka hliðunum
 

Vinna hafin við Kjósarskarðsveg

Sep 03 '15

Löngu tímabært verk er nú loks hafið við að setja bundið slitlag á Kjósarskarðsveg (nr. 48).

Það var verktakafyrirtækið Þróttur ehf, Akranesi sem átti lægsta tilboðið í framkvæmdina, rúmar 214 mkr.

Í þessum áfanga verður farið frá Þingvallavegi að Fremra- Hálsi, eða um helming þess hluta sem ómalbikaður er af Kjósarskarðsveginum. Vonir standa til að í kjölfarið verði haldið áfram og klárað að setja bundið slitlag áleiðs að Vindási, þar sem malbik er.

Þessi framkvæmd er mikið fagnaðarefni fyrir íbúa Kjósarinnar, gesti þeirra og ekki síður þá fjölmörgu ferðamenn sem leggja leið sína um sveitina á ferð sinni milli Þingvalla og Hvalfjarðar.

Þessum verkáfanga skal að fullu lokið eigi síðar en 1. nóvember 2016.  

Frétt af Kjos.is

Ný veðurstöð komin í gagnið

Aug 29 '15

Eins og glöggir lesendur hafa eflaust tekið eftir þá gaf gamla veðurstöðin upp öndina fyrir nokkrum vikum og hætti að sýna hitastig. Ég pantaði nýja veðurstöð og er nú búinn að setja hana upp.

Veðurstöðin er af gerðinni Vantage Pro2 og er þónokkuð meira pró en sú gamla (enda er orðið 'pro' í nafninu á þessari nýju).

Geir á nr 44 hjálpaði mér að setja niður 3m langa stálstöng til að hengja græjuna á og ættu mælingarnar að vera miklu nákvæmari en þær hafa verið áður.

Ég vona að þið njótð nýju tækninnar! :-)

Vegavinna

Aug 27 '15

Sælt veri fólkið.

Veganefndin er búin að vera að ræða við verktakann og það verður að fresta vinnunni þar til svona 20. September því þá líkur veiðitímabilinu en það er erfitt að fá að taka efni úr ánni fyrir þann tíma.

Það er líka verið að vinna í því að fá leyfi fyrir efnistöku en það er örlítið flóknara en héldum. Við vonum að þetta leysist samt allt saman.

Eins og þið hafið líklega tekið eftir þá er búið að senda út rukkanir fyrir vegavinnunni eins og rætt var um á fundinum og tilkynnt í fyrri fréttum. Eindaginn er í byrjun September.

Við látum ykkur svo vita þegar nær dregur hvernig þetta verður allt saman.

Niðurstaða félagsfundar

Aug 17 '15

Félagsfundurinn gekk vel og það var fín mæting. Það var rætt um vegamál, myndavélavöktun og vatnsveitu.

Helstu mál:

• Stjórnin stefnir að því að hefja myndavélavöktun í Norðurnesinu í haust.
• Næsta vor verður bætt við neyðarfæðingu í vatnstank.
• Veganefnd hefst handa við fyrirhugaðar framkvæmdir á vegi.
• Gjald á lóð vegna vegaframkvæmda er 23,000 kr.
• Kostnaður vegna annarra framkvæmda verður borgaður úr félagssjóði.

​Hérna er fundargerðin og hérna er kynningin sem var flutt á fundinum.

Vegaframkvæmdir munu væntanlega byrja í lok ágúst og það verður send út tilkynning þegar nær dregur. Rukkanir verða einnig sendar út á sama tíma.

Stjórnin vill sérstaklega þakka Jóni Snædal fyrir góða fundarstjórn og það var ánægjulegt að sjá hversu góð umræða átti sér stað um þessi mál.

Ef fólk hefur eitthvað við fundargerðina að bæta eða einhverjar spurningar vakna þá er hægt að hafa samband við stjórnina með því að senda póst á stjorn@nordurnes.is.

 - Stjórnin

Minnum á félagsfundinn

Aug 12 '15

Við viljum minna á félagsfundinn í kvöld kl 20.00 í Gerðubergi. Auk félagsmanna eru aðrir bústaðaeigendur á svæðinu boðnir til að ræða um vegamálin.

Sjá fyrri frétt hér.

Hitastigið í veðurstöðinni er niðri

Aug 12 '15

Því miður virðist hitamælirinn í veðurstöðinni vera ónýtur. Ég mun notast við hitastigið frá spánni sem skítamix í bili þannig að það er ekki 100% rétt en er nokkuð nálægt.

Ég kaupi mér væntanlega nýja veðurstöð sem fyrst.

Nýtt kjöt á Sogni

Aug 08 '15

Ekki þarf að örvænta þótt ekki sé lengur hægt að kaupa kjöt hjá Matarbúrinu því fjölskyldan á Sogni hefur nú opnað nýja og flotta afgreiðslu þar sem hægt er að kaupa alls kyns nautakjöt. Við hjónakornin á 74 höfum þegar nýtt okkur þetta nokkrum sinnum og keypt þar hamborgara, hakk og steikur. 

Hægt er að fara á Sogn hvenær sem er til þess að kaupa sér glerfína steik á grillið. 

Sogn er næsti bær við Reynivelli og er því við ytri veginn í Kjósina, þann sama og Háls/Matarbúrið stendur við.

Síminn hjá þeim er 566 7040.

Vatnsleysi

Aug 07 '15

Eins og kom fram í sms skeytinu sem ég var að senda þá er vatnslaust í Norðurnesinu. Ég rabbaði við Sigurð Guðmunds um ástandið og hann mælti með að prófa að loka fyrir rennsli á nóttunni til að gefa tankinum tækifæri til að safna vatni.

Við lokuðum fyrir vatnið klukkan 22.00 í kvöld og ætlum að kíkja á aðstæður í fyrramálið um 08.00 leytið og opna þá fyrir aftur.

Það verður því væntanlega alveg vatnslaust hjá öllum í nótt. Passið að hafa ekki opið fyrir þurra krana því það kemur þrýstingur aftur á kerfið eldsnemma í fyrramálið.

Fundur um vegavinnumál og fleira

Aug 04 '15

Kæru félagar,

Eins og við minntumst á í frétt fyrir mánuði þá er mikil þörf á viðgerðum á veginum. Stjórn og veganefnd eru búin að setja saman framkvæmdaráætlun sem okkur langar að ráðast í nú í ágúst.

Við viljum ræða þetta við ykkur og fá samþykki fyrir áætluninni og aukakostnaði þar tengdum. Fundurinn verður haldinn í Gerðubergi miðvikudaginn 12. ágúst kl 20.00 (salur B eins og venjulega).

Auk vegaframkvæmda verður kynnt áætlun um myndavélavöktun og rætt um vatnsveitu. Ef þið hafið eitthvað fleira til að ræða þá verður einnig tækifæri til þess.

Við hvetjum sem flesta til að mæta til að ræða þessi mikilvægu mál.

Stjórnin